Ársskýrsla Suðurlandsdeildar 2020 – 2021
Ágætu sjúkraliðar.
Aðalfundur Suðurlandsdeildar dróst fram á árið 2021. Var fundurinn loks haldin 9. febrúar og fór fram í gegnum Zoom fjarfundabúnaði. Covid-19 faraldurinn hefur einkennt starfsárið og sett skorður á samkomuhald.
Fundarstjóri var kosinn Elínborg Telma Ágústsdóttir. Engar breytingar urðu á stjórn og gáfu þær Elínborg Telma Ágústsdóttir og Guðbjörg S. Stefánsdóttir kost á sér áfram.
Margrét Auður Óskarsdóttir, Elínborg Telma Ágústsdóttir og Helga S. Sveinsdóttir. Á myndina vantar Guðbjörgu Sigrúnu Stefánsdóttir.
Lyflæknisdeild HSU mun áfram skipa skemmtinefnd. Kjörstjórn skipa þær Þóra Bjarney Jónsdóttir, Guðbjörg S. Stefándóttir og Dagný Ómarsdóttir. Skoðunarmenn reikninga eru þær Guðrún Ágústsdóttir og Ragnheiður Jónsdóttir. Í Suðurlandsdeild eru 138 félagsmenn og sendir tvo fulltrúa á fulltrúarþing SLFÍ. Voru þær Helga S. Sveinsdóttir og Margrét Auður Óskarsdóttir kjörnar fulltrúar deildarinnar.
Félagsstarf á vegum Suðurlandsdeildar lá að mestu niðri vegna Covid-19. Þó fóru nokkrir vaskir sjúkraliðar á vordögum og tóku vorþrif í tveimur orlofsíbúðum félagsins í Reykjavík. Greiðsla frá Orlofsjóði fer síðan inn á einkareikning Suðurlandsdeildar og bíður þar þangað til hægt er að hóa sjúkraliðum saman og gera eitthvað skemmtilegt.
Á Evrópudaginn 26. nóvember reyna sjúkraliðar að minna á sig, en vegna samkomutakmarkanna var ekki í boði að vera með vöfflukaffi á HSU. En við settum upp litlu fánana okkar og buðum upp á myntu og ýmsa smáhluti á kaffistofunum.
Fundir stjórnar voru þrír á árinu, en samskipti á netinu því til viðbótar. Trúnaðarmannaráðsfundir voru tveir og voru þeir haldnir í fjarfundi á Zoom. Gekk þetta fundarform ágætlega. Félagsstjórn fundaði mánaðarlega og gengur vel að nota fjarfundaformið. Voru þessir tíðu fundir ekki síst til að upplýsa hvernig gengi með innleiðingu á “betri vinnutíma”.
Fræðslunetið felldi niður námskeið sem boðið var upp á. Það er nokkuð áhyggjuefni hversu dræm aðsókn er á námskeiðin. Covid-19 á líklega sökina. Ef sjúkraliðar skrá sig ekki á námskeið gæti verið hætta á að Fræðslunetið bjóði ekki upp á námskeið fyrir sjúkraliða. Við þurfum því að bretta upp ermar og sækja námskeið og muna að í kjarasamningum eru námskeiðsstundir metnar til launa. Hjá ríkinu eru fjögur þrep í boði og gera það 10% kauphækkun.
Engir sjúkraliðar útskrifuðust frá FSu á starfsárinu en þaðan verður væntanlega útskrifað á því næsta.
Ekki voru 1. maí hátíðarhöld vegna Covid-19.
Ég þakka öllum sem hafa lagt fram vinnu í þágu deildarinnar. Trúnaðarmenn eru lykilmenn þegar kemur að því að vera augu og eyru félagsins. Síðan er skrifstofan á Grensásveginum öllum opin og greiðir úr öllum vanda.
Helga S. Sveinsdóttir
formaður Suðurlandsdeildar