Vikan sem leið - lyfjamál, menntamál, félagsstarf og gott samtal

Lyfjamál rædd við Velferðarnefnd Alþingis

Framkvæmdastjórn félagsins hóf vikuna á fundi Velferðarnefndar Alþingis til að fylgja eftir umsögn félagsins um frumvarp um viðbrögð við lyfjaskorti. Fundurinn var gott tækifæri til að koma sjónarmiðum sjúkraliða á framfæri og minna á mikilvægt hlutverk stéttarinnar í daglegri framkvæmd heilbrigðisþjónustunnar. Við lögðum sérstaka áherslu á að sjúkraliðar sinna ábyrgðarmiklum verkefnum í tengslum við lyfjagjöf, eftirlit með líðan sjúklinga, eftirfylgni með áhrifum meðferðar, skráningu og miðlun mikilvægra upplýsinga til annarra heilbrigðisstarfsmanna. Þetta eru verkefni sem skipta miklu máli fyrir öryggi sjúklinga og gæði þjónustunnar.

Það sem við bentum á er að þrátt fyrir að sjúkraliðar sinni þessum verkefnum á hverjum degi, þá eru þeir hvergi sýnilegir í lyfjalögum. Lögin fjalla um ávísun lyfja, afhendingu, skömmtun og viðbrögð við lyfjaskorti, en þau taka ekki nægilega skýrt mið af þeim hópi heilbrigðisstarfsfólks sem tekur þátt í framkvæmdinni sjálfri á vettvangi. Við vorum skýr með  kröfu okkar um að lög og reglur endurspegli betur raunveruleikann í heilbrigðisþjónustunni. Sjúkraliðar eiga að vera sýnilegir í þeim verkefnum sem þeim er ætlað að sinna og bera ábyrgð á, ekki síst þegar um er að ræða verkefni sem hafa bein áhrif á öryggi sjúklinga.

Þetta er í grunninn öryggismál, faglegt mál og sanngirnismál. Skýrari lagarammi styrkir ábyrgð, eykur samræmi milli stofnana og styður við faglegt starf sjúkraliða. Það er ekki nóg að sjúkraliðar beri ábyrgð í reynd ef sú ábyrgð er hvergi viðurkennd með skýrum hætti í lögum. Við höldum áfram að fylgja málinu eftir því sjúkraliðar eiga að vera sýnilegir þar sem ákvarðanir eru teknar um störf þeirra, ábyrgð og framtíð heilbrigðisþjónustunnar.

Vinnustofa um framtíðina – og fullt af góðum hugmyndum

Í vikunni tókum við einnig þátt í vinnustofu mennta- og barnamálaráðuneytisins um heildstæðara nám í heilbrigðis- og félagsgreinum á framhaldsskólastigi. Þar var rætt um nám, starfsþróun og framtíð starfa á heilbrigðis- og félagsþjónustusviði.

Það sem stóð hvað skýrast upp úr var mikilvægi þess að gera leiðir inn í nám og starf einfaldari, sýnilegri og raunhæfari. Þátttakendur lögðu áherslu á þrepaskipt nám, þar sem fólk getur tekið nám í skrefum, fengið fyrri reynslu metna og séð skýra tengingu milli náms, starfsþróunar, ábyrgðar og kjara. Raunfærnimat kom einnig sterkt fram í umræðunni. Við vitum að víða starfar fólk með mikla reynslu, þekkingu og hæfni sem þarf að fá viðurkenningu. Það þarf þó alltaf að gerast með skýrum faglegum ramma, þannig að gæði náms, starfsréttindi og öryggi þjónustunnar séu tryggð.

Íslenskukennsla var annað stórt mál. Þar kom skýrt fram að íslenskunám þarf að vera markvisst, aðgengilegt og tengt starfinu sjálfu. Þar þurfa vinnustaðir, skólar og stjórnvöld að vinna saman. Síðan var það ímyndin, og þar eigum við svo sannarlega verk að vinna. Við öll þurfum að tala störfin okkar upp. Við sem þekkjum til þessara starfa vitum að þau eru fjölbreytt, gefandi og mikilvæg störf þar sem fagmennska, ábyrgð, samskipti og mannleg tengsl eru í forgrunni á hverjum einasta degi.

Það var sérstaklega ánægjulegt að sjá hvað margir horfðu til samstarfs sem lykils að árangri. Skólar, vinnuveitendur, stéttarfélög, ráðuneyti, stofnanir og starfsfólkið sjálft þurfa öll að koma að borðinu. Það þarf skýra sýn, raunhæfar aðgerðir og vilja til að fylgja málunum eftir. Það er ljóst að hugmyndirnar eru til staðar og viljinn líka. Nú þarf að breyta þeim í aðgerðir. Við þurfum að halda áfram að berjast fyrir betra námi, sterkari starfsþróun, aukinni virðingu og betra starfsumhverfi.

Aðalfundir BSRB og Kletts

Í vikunni sóttu fulltrúar félagsins aðalfund BSRB þar sem m.a. var farið yfir sameiginleg hagsmunamál. Samstarf Sjúkraliðafélagsins við BSRB er félaginu mikilvægt, enda eigum við þar öflugan vettvang með öðrum stéttarfélögum sem vinna að réttindum, kjörum og starfsumhverfi opinbers launafólks. Þar eru mál eins og mönnun, vinnuvernd, jafnrétti, launaþróun, húsnæðismál og gæði opinberrar þjónustu í forgrunni, og það skiptir miklu máli að sjúkraliðar séu sýnilegir í því samtali.

Aðalfundur Styrktarsjóðsins Kletts var einnig haldinn í vikunni. Þar var létt yfir fólki og gott að finna þann samhug sem ríkir um mikilvægt hlutverk sjóðsins. Á fundinum lét Ingunn Jónsdóttir frá stéttarfélaginu Kili af störfum í stjórn sjóðsins eftir áratuga setu, og ber að þakka henni fyrir það mikla framlag. Í hennar stað var Hulda Guðmundsdóttir, formaður Kjalar, kjörin í stjórn sjóðsins og óskum við henni velfarnaðar í starfinu.

Vikan hefur því verið fjölbreytt: Alþingi, ráðuneyti, aðalfundir, heimsóknir, samtöl og stefnumótandi vinna. Allt tengist þetta þó sama kjarna, að styrkja stöðu sjúkraliða, standa vörð um fagið og tryggja að rödd félagsmanna heyrist þar sem ákvarðanir eru teknar.

Góða helgi!