Menntasjóðir

Samkvæmt lögum um sjúkraliða ber þeim að viðhalda þekkingu sinni í samræmi við þær breytingar er verða innan heilbrigðiskerfisins. Einnig ber þeim að auka þekkingu sína með því að taka nám og eða námskeið er veita hagnýta sem og fræðilega menntun sem eykur gildi starfa sjúkraliða á þeim sviðum sem þeir starfa á. Til þess að koma til móts við þessar þarfir hefur ötult starf fræðslunefndar verið fólgið í því að bjóða upp á það nám og þau námskeið sem hafa þetta að markmiði. Sjúkraliðafélag Íslands hefur lagt áherslu á að sjóðir félagsins komi til móts við það markmið að sjúkraliðar geti menntað sig, haldið heilsu, náð heilsu, slakað á í orlofi og átt möguleika á að gera þetta án þess að fjárhagur komi í veg fyrir slíkt.

Markmið sjóða félagsins er að gera sjúkraliðum kleift að leita eftir fjárstuðningi vegna kostnaðar við nám, sem tengist starfi þeirra. Þeir sem hafa verið félagsmenn í 12 mánuði eiga rétt á styrk og rof á aðild getur aldrei verið lengri en 6 mánuðir.

Starfsmenntasjóður


Starfsmenntasjóður Sjúkraliðafélags Íslands er fjármagnaður með framlagi atvinnurekenda. Til sjóðsins greiðir ríkið  og SFV 0.32% af öllum launum, og þeir sem fylgja samningum þess 0.32% af öllum launum. Sveitarfélögin og Reykjavíkurborg greiða 0.30%.

Markmið sjóðsins er að styðja félagsmenn Sjúkraliðafélagsins til starfsnáms og símenntunar án verulegs kostnaðar svo þeir getið viðhaldið menntun sinni og þekkingu í samræmi við lög um heilbrigðisstarfsmenn.

Fjárhagur sjóðsins hefur svigrúm til að veita félagsmönnum allt að 100,000 kr. styrk á tveimur árum. Hafi sjóðfélagi fullnýtt sér styrkinn á hann ekki rétt á fjárveitingu úr sjóðnum næstu tvö árin.

Styrkir úr þessum sjóði eru veittir sjúkraliðum til náms eða símenntunar er að jafnaði varða annað hvort starf eða fagsvið félagsmanns.
Nám eða námskeið til að auka almenna starfshæfni á sviði tölvutækni og tungumála eru styrkhæf.
Nám eða námskeið án beinnar tengingar við starf eru einnig styrkhæf að vissu marki.

Úthlutunarreglur Starfsmenntasjóðs

Starfsreglur Starfsmenntasjóðs

Starfsþróunarsjóður


Tilgangur og markmið sjóðsins er annars vegar að efla starfsþróun sjúkraliða með það fyrir augum að þeir verði færari til að takast á við sífellt fjölbreyttari verkefni og hins vegar að auka möguleika stofnana á að þróa starfsvið sitt þannig að það samræmist þeim kröfum sem gerðar eru til stofnana á hverjum tíma.

Markmiði sínu hyggst sjóðurinn ná með því að styrkja sjúkraliða til frekari menntunar og starfsþróunar og stofnanir ríkisins til framþróunar á sama grunni. Einnig styrkir sjóðurinn fræðslu- og þróunarverkefni hjá þeim aðilum og stofnunum sem að sjóðnum standa og fjármagnar þau verkefni sem sjóðsstjórn skipuleggur. Um styrkúthlutanir fer eftir nánari reglum sem stjórn sjóðsins setur.

Úthlutunarreglur Starfsþróunarsjóðs

Starfsreglur Starfsþróunarsjóðs

Umsóknareyðublað fyrir stofnanir og vinnuveitendur

Fræðslusjóður


Fræðslusjóður Sjúkraliðafélags Íslands er fjármagnaður með 0,25% iðgjaldi af heildarlaunum félagsmanna SLFÍ, sem starfa hjá ríkinu auk 7 milljóna upphafsframlags.
Sjóðnum er ætlað að vinna að því að styrkja fræðslu sjúkraliða, fyrirkomulag hennar og umhverfi.

Aðalviðfangsefni sjóðsins eru fagleg forysta og samhæfing í fræðslumálum sjúkraliða. Samstarf við símenntunarmiðstöðvar, fræðslusetur og aðra sjóði. Rekstur á fræðsluverkefnum, svo sem með útvistun til t.d. Framvegis og fleira. Formgerð og þjónusta við „fagráð“ sem og faglegt utanumhald um þekkingu og þjónustuaðila/fagaðila.

Sjóðurinn er einungis bundinn reglum og ákvörðunum stjórnar og sjálfstæði hans skýrt. Sjóðurinn er undir sameiginlegri stjórn samningsaðila, ríkissjóðs og Sjúkraliðafélags Íslands.

Starfsreglur Fræðslusjóðs

Til baka