Reglur lífeyrisdeildar Sjúkraliðafélags Íslands

1. gr.: Aðild að deildinni

Rétt til aðildar að deild eftirlaunafólks Sjúkraliðafélags Íslands eiga allir sjúkraliðar sem eru á eftirlaunum og/eða ellilífeyri eða eru á örorkubótum samkvæmt lögum Lífeyrissjóðs starfsmanna ríkisins, Lífeyrissjóðs starfsmanna Reykjavíkurborgar eða annarra lífeyrissjóða sem sjúkraliðar greiddu til af sjúkraliðalaunum, enda hafi þeir verið félagsmenn er þeir létu af störfum.

2. gr.: Hlutverk og markmið deildarinnar

Deildin starfar í samræmi við ákvæði félagslaga Sjúkraliðafélags Íslands og starfsreglum er hún setur sér í samráði við stjórn félagsins.

Viðfangsefni deildarinnar:

  • aðgæta í hvívetna hagsmuna lífeyrisþega, m.a. með því að fylgjast með breytingum sem verða á skipan starfa í launaflokka og koma á framfæri athugasemdum eða ábendingum til lífeyrissjóða ef þörf krefur.
  • aðhalda skrá um alla þá sem rétt eiga til aðildar að deildinni.
  • aðhalda uppi kynningar- og félagsstarfi með deildarfélögum, skemmtikvöldum og með ferðalögum innanlands og utan, verði því viðkomið.
  • að vinna að því að sköpuð verði sem fjölbreyttust starfsaðstaða fyrir lífeyrisþega þ.m.t. að auðvelda lífeyrisþegum sjálfsnám.

3. gr.: Kosning stjórnar

Á aðalfundi eftirlaunadeildarinnar skal velja 5 menn til þess að annast hefðbundin stjórnarstörf. Einn stjórnarmaður skal tilnefndur af stjórn Reykjavíkurdeildar Sjúkraliðafélags Íslands og skal hann tryggja nauðsynleg tengsl milli eftirlaunadeildarinnar og félagsins. Velja skal jafnmarga varamenn í deildarstjórn. Varamenn skulu boðaðir á stjórnarfundi enda eiga þeir rétt til setu á stjórnarfundum, með málfrelsi og tillögurétti.

4. gr.: Kjör formanns, hlutverk stjórnarmanna

Formann skal velja sérstaklega en að öðru leyti skiptir stjórnin með sér verkum eftir því sem hentar hverju sinni. Formaður fer með umboð deildarinnar til setu á þeim fundum stjórnar Reykjavíkurdeildar félagsins, þar sem málefni deildarinnar eða lífeyrisþega eru á dagskrá. Varaformaður skal valinn úr hópi stjórnar- eða varastjórnarmanna.

5. gr.: Kjörtímabil stjórnar

Formann og varamenn í stjórn skal velja árlega, en meðstjórnendur til tveggja ára og ganga tveir stjórnarmanna úr stjórninni hverju sinni, í fyrsta sinn eftir hlutkesti. Endurkjör er heimilt.

6. gr.: Boðun stjórnarfunda

Stjórnarfundi skal halda að boði formanns eða samkvæmt ákvörðun stjórnar deildarinnar um reglulega fundardaga. Fundir eru lögmætir ef þrír eða fleiri stjórnarmanna eru mættir.

7. gr.: Verkefni stjórnar

Formaður gegnir öllum venjubundnum formannsstörfum. Varaformaður gegnir störfum formanns í forföllum hans. Ritari skal halda gerðabók um ákvarðanir og gerðir stjórnar- og frá almennum deildarfundum. Féhirðir hefur umsjón með fjármálum deildarinnar.

8. gr.: Aðalfundur deildarinnar

Á tímabilinu 15. september til 31. október skal boða til aðalfundar deildarinnar með minnst 3 daga fyrirvara. Á fundinum ber deildarstjórn að gefa skýrslu um starfsemina á liðnu starfstímabili.

Dagskrá aðalfundar:

  1. Kosning fundarstjóra og annarra starfsmanna.
  2. Skýrsla stjórnar.
  3. Reikningar deildarinnar.
  4. Tillögur um breytingar á reglum deildarinnar.
  5. Kosning formanns.
  6. Kosning stjórnar.
  7. Kosning félagskjörinna skoðunarmanna.
  8. Kosning fulltrúa til setu á fulltrúaþingi Sjúkraliðafélags Íslands.
  9. Lögð fram tillaga að fjárhagsáætlun deildarinnar til samþykktar
  10. Önnur mál.

9. gr.: Boðun deildarfunda

Deildarfundi skal boða með auglýsingu í blaði samtakanna Sjúkraliðanum, auglýsingu í dagblaði, öðrum fjölmiðli eða með bréfi til deildarfélaga. Leitast skal við að ákveða allt funda- og félagstarf deildarinnar fyrir ákveðin tímabil í senn og tilkynna það í bréfi til félagsmanna.

10. gr.: Lagabreytingar

Lögum deildarinnar má aðeins breyta á aðalfundi, enda hafi tillögur að lagabreytingum borist deildarstjórn áður en aðalfundurinn er auglýstur og skal tillagnanna getið í fundarboði. Úrslitum um lagabreytingar ræður einfaldur meirihluti greiddra atkvæða.

Heimilt er að gera breytingartillögur við löglega frambornar tillögur til lagabreytinga, enda feli breytingartillaga ekki í sér óskyld efni við upphaflegu tillöguna.

Drög að reglum deildar eftirlaunafólks innan Sjúkraliðafélags Íslands voru lagðar fram til kynningar á undirbúningsfundi að stofnun deildarinnar í Úthlíð, Biskupstungum í október 1997 og samþykktar á stofnfundi deildar eftirlaunafólks innan Sjúkraliðafélags Íslands þann 13. október 1998.

Til baka